憑嶄新胃潰瘍療法而獲各方嘉許嘅中文大學校長沈祖堯,雖然佢嘅研究成果造福病人,但亦令到某啲胃藥嘅銷路大幅下降,令佢成為藥廠盈利嘅「千古罪人」。尋日沈校長喺貿易發展局一個分享會上,透露當日嘅研究,只係打算為人類嘅健康出一分力,可惜導致藥廠股價下挫,實在始料不及。

沈祖堯話自己當年嘅研究導致某藥廠股價下跌,實在始料不及。

沈校長話多年前佢接到倫敦一間投資銀行來電,向佢查詢一篇研究報告嘅內容。當時佢大惑不解,自己嗰篇有關幽門螺旋桿菌嘅研究,同投資銀行有乜關係呢?原來對方收到風,知道佢嘅研究可能會改變胃潰瘍嘅療法,因而令某啲昂貴嘅胃藥乏人問津,所以就向佢求證,以建議客戶減持藥廠股票咁話。結果佢篇研究報告翌日刊出,相關藥廠嘅股價果然應聲下跌。

佢嗰篇研究報告得以刊出亦經過一番波折。話說佢原本係向英國一份醫學期刊投稿,可惜被拒絕發表。佢以為自己嘅研究無用,惟有將研究報告以海報形式喺一個醫療展覽中展出,此舉正好吸引到一位醫療雜誌主編留意並予以刊登。佢話機會會不期而至,大家要把握。

第一手消息請下載on.cc東網iPhone/iPad/Android/Windows Phone Apps