政壇：白鴿黨慶自取其辱
白鴿黨將喺本月二十七日舉行黨慶晚會，有消息就話，因為白鴿黨打正旗號要求特首下台，該黨立法會議員「AV仁」何俊仁又聲言要發動辭職公投，所以政府問責團隊都唔會出席該黨黨慶。該黨主席劉慧卿話，如果當局決定同該黨「全面搞對抗」、「過唔去」嘅話，當局自己選擇咁話。不過，白鴿黨呢頭喺議會搞不合作運動，嗰頭又請官員去黨慶，真係自相矛盾，被人拒絕都係自取其辱喇！
設計圖片及對白
「周奕希」跳船做政協？
話說有消息話，由於白鴿黨同政府過唔去，加上黨慶晚會有籌款成分，如官員站台協助籌款，身份會好尷尬，所以當局就決定唔出席晚會。卿姐承認已向官員發出邀請，除咗運輸及房屋局局長張炳良、食物及衞生局局長高永文話會出席外，大部分都未回覆，佢會尊重官員嘅決定，但當局係咪要同該黨搞對抗，就自行決定喎。呢頭話尊重官員決定，嗰頭又暗示官員唔到係搞對抗，究竟即係想點呢？
其實白鴿黨黨慶原定喺舊年十月舉行，但因為泛民主派要瞓身搞佔領行動，先至擱置咗。聞說原本佢哋諗住打正白鴿黨成立「二十周年」旗號，應該會籌到唔少錢，但依家已經過晒氣，加上日子接近農曆新年，似春茗聯歡多過黨慶，所以都唔敢對籌款有乜奢望。
講開又講，尋日都講過老嫩鴿跳船，當中白鴿黨葵青區議員周奕希上月就提交咗退黨申請，佢話因為想轉個身份，但有消息就話，其實係因為佢做咗肇慶市政協。根據肇慶市人民政府網站上月公布，確係有一位增補政協委員叫「周奕希」，但因為聯絡唔到周奕希，所以就無法證實消息真偽喇！
