與其乞求疫苗 何不自力更生
屋漏偏逢連夜雨。冬季流感來勢洶洶，加上病毒出現「抗原漂移」，搞到疫苗效用大打折扣，防不勝防。雖然話新疫苗最快四月可以運到本港，但到時流感高峰期已過，新疫苗隨時成為明日黃花嘅咋。
聽吓專家點講啦。港大微生物學系講座教授袁國勇指出，香港冇流感疫苗生產基地，亦冇其他可以對付流感嘅抗病毒藥，除咗等到四月新疫苗喺南半球地區投入使用後，睇吓可唔可以「乞求」多少，依家基本上冇嘢可以做。你知啦，今年過咗個零月咋，流感已經造成百幾人死亡，有人估計全年死亡個案可能高達四百人，殺傷力比當年沙士有過之而無不及，新疫苗唔可以及早應市，後果真係不堪設想。所以，袁國勇認為，香港應該靠自己研發及製造疫苗。
冇錯嘞，人不為己天誅地滅，歐美藥廠研發出新疫苗，梗係優先照顧自己人，幾時輪到香港吖。正如幾年前H1N1流感大爆發，全球生產嘅九億劑疫苗幾乎畀先進國家搶購一空。香港乜都冇，次次都要「乞求」人哋，講起真係可悲。
所以話啫，求人不如求己，香港唔想下下受制於人，長遠之計係自行研發疫苗。其實，唔係冇得諗o架，呢類產業唔需要勞力密集，只要有相關人才同專業知識就可以成事。再講吖，香港嘅品質管理同檢測喺國際上一向名聲唔錯，疫苗掛住「香港製造」品牌，除咗可以供應本地市場，仲可以供應中國同東南亞市場，唔憂冇生意o架。
可惜吖，講係咁講，但做唔做得到係另一回事，尤其港產官僚一向眼高手低，靠佢哋研製疫苗，等於緣木求魚嘅咋。係人都知，周邊地區積極發展多元經濟，尤其係同屬「亞洲四小龍」嘅南韓，近十幾年銳意發展科技創意產業，搞到有聲有色，連日本都唔係對手。又好似芬蘭咁，人口仲少過香港，當年諾基亞手機一樣搞到風生水起，一度領先全球添。唔怕唔識貨，最怕貨比貨，人哋多元發展，香港就故步自封，唔係炒樓，就係炒股，又點會有運行吖。
最好笑係，前朝貪曾政府話金融業可以養活一千萬人，簡直幼稚兼無知。現屆政府話就話想做番啲嘢，偏偏遇着政客阻頭阻勢，淨係一個創科局都唔知要拖到幾時。點都好喇，港府成日話要發展高科技產業，與其大隻講，不如就由疫苗研發開始啦，叮！
