城中鏡：黃國英睇好fb長線表現
早前facebook（fb）壞機成為城中熱話，但大家又記唔記得，原來啱啱過咗嘅星期三（二月四日），係facebook面世（2004年2月4日）十一周年嘅大日子呢？十一年間，fb（同埋fb嘅投資者），又經歷過幾多苦與樂呢？
黃國英話社交媒體仲係未來嘅大趨勢，依然睇好fb長線表現。（資料圖片）
fb今時今日已發展成一間擁有13.9億位每月活躍用戶，市值超過2,110億美元嘅納指上市公司。而fb今年生日嗰日股價收報75.63美元，比一二年上市時嘅招股價38美元，升咗近一倍。
講開fb，豐盛金融資產管理董事Alex黃國英管理嘅基金都持有緊fb，依家佔基金組合唔夠2%。雖然比重唔算好多，但原來佢仲持有fb相關call輪，行使價分別大概係100同140美元，出年一月先到期。Alex話今年fb係投資期，短期見唔到大升催化劑，向上80美元有阻力，但下面72美元又有支持，暫時都唔諗住加注。不過，佢話社交媒體仲係未來嘅大趨勢，依然睇好fb長線表現，個人又認為fb係有較高成本效益嘅宣傳平台。至於有人話fb成日亂買嘢，Alex就反駁，Google等科技股嘅研發開支都好驚人，只係大家將資源用喺唔同地方。
