城中鏡：叫炒麵揀走韭黃林煥光唔惜食

由於生活節奏急促，港人經常食無定時，早前有日下午大約四點鐘，記者行經金鐘海富中心商場，見到行政會議非官守議員召集人WK林煥光現身一間快餐店，個樣好疲倦。佢速叫一碟韭黃炒麵同熱飲，但起筷第一件事係逐條揀走啲韭黃唔食，然後不消五分鐘就食晒碟麵走人，睇嚟好肚餓又好趕時間，唔通佢忙到連午飯都未食？

耐心將韭黃揀走擺埋一邊唔食，但炒麵就大啖食。

林煥光（左）喺餐廳收銀處離遠睇餐牌，然後速速買飛。

用紙巾抹眼角，林煥光個樣勁攰。

紙巾抹眼一臉倦容

當日WK步履輕慢行入餐廳，先喺水牌前望一望，然後到收銀處畀錢落柯打，到櫃位畀飛後，就攞咗杯熱飲同號碼籌坐低靜候。見佢坐定後就除低眼鏡閉目養神，期間不時用手輕捽雙眼，又拎張紙巾出來抹眼角，個樣勁攰。

冇耐侍應將一碟炒麵送到，WK拿拿聲拎起筷子，但唔係即刻開餐，而係慢條斯理咁逐條揀開韭黃擺埋一邊，揀到咁上下，佢先至大啖大啖食，不消幾分鐘就搞掂，然後起身離去。當日唔係星期二，又唔使晨早流流開行政會議，唔知佢忙緊乜嘢，搞到個人冇晒精神，又唔知趕住去邊呢？

講開又講，WK唔食韭黃認真失策，一來大庭廣眾揀飲擇食教壞細路，又唔夾惜食潮流，如果畀環境局局長黃錦星見到，實要話佢兩句。其實韭黃含有多種礦物質，營養豐富，對眼睛同提升人體免疫力都有益處，從中醫理論來講，韭黃亦具有健胃、提神及保暖功效。當日所見，WK眼攰又精神欠佳，應該食多啲韭黃至真。