政壇：網友諷克勤仔被「賜死」
話說有網民今個星期二喺社交網站貼圖，見到「建仔」民建聯同新界社團聯會張貼宣傳橫額，支持政改方案，但係橫額標示大埔區議會主席張學明同立法會新界東議員陳克勤，竟然誤植陳克勤為陳克「群」。網民講笑話「民建聯/特區政府鄭重宣布『陳克勤』已死。根據遞補機制，現在由『陳克群』接任，避免觸發補選，以節省公帑」。有網民話，尋日凌晨相關橫額已被移走。
陳克勤
網民上載呢幅印錯名嘅橫額，揶揄「陳克群」已取代陳克勤。（互聯網圖片）
嘩！名都印錯，咁都出得街，網民睇到實玩鋪勁喇，點會放過寸人嘅機會吖！身在廈門開會嘅克勤仔解釋，因為內地製造商出錯，聲稱「勤」同「群」嘅普通話同音，所以搞錯，而製造商亦已向建仔發道歉信。不過，呢個解釋有啲牽強，事關兩個字係唔同音嘅，內地人搞錯就更加講唔通啦，況且送貨都會驗收啩？
