尋日喺立法會見到新界鄉議局一班鄉紳，原來佢哋係應邀嚟同班議員打牙骹食餐飯，身兼鄉議局主席嘅劉皇發率領執委侯志強、林國昌等，同林大輝、謝偉銓等議員聯誼一番。不過，鄉議局執委簡松年話立法會只係「口水會」兼冇用，嘲諷「噴多啲（口水）就有用喇！」唔通發叔作為立法會代表都幫唔到鄉紳爭取權益？

簡松年（左三）寸爆立法會只係「口水會」兼無用。

我哋問過發叔會面傾咗啲乜？發叔半開玩笑話自己失憶，「一出門口已經乜都唔記得晒喇！」近日流感肆虐，發叔有冇做好防禦措施？佢就喺口袋攞個口罩出來話帶咗喇，原來只係將口罩「袋住先」，相反副主席張學明因為患感冒，尋日出席會議後就提早離場，免得喺飯局散播病菌。

侯志強透露，會上向議員建議放寬丁屋高度限制，解決原居民住屋需要。林大輝仲即席提議籌組「鄉黨」，唔通大輝加入富貴黨不成，想向鄉議局靠攏？乜大輝唔係舊年已加入鄉議局出任顧問咩？

第一手消息請下載on.cc東網iPhone/iPad/Android/Windows Phone Apps