政壇：泛民替身入中策組

作為政府大腦嘅中央政策組，最近都密密搵咗唔少人擔任特邀顧問，除咗我哋之前講過嘅離島區議員周浩鼎同香港大學教授關品方之外，原來中策組上月下旬又再委任多三名特邀顧問，分別係學聯老鬼、激進泛民領袖家人同埋建制派議員嘅太太。

兄妹政見一向唔同

獲邀嘅三人分別係黃醒華、袁彌昌同王沛詩，驟眼睇未必知道佢哋嘅底細，但搵多啲資料，就知道佢哋都算係有來頭。首先黃醒華係喺七十年代學運「火紅年代」時，做過學聯會長，現職力嘉精密有限公司董事。同屆嘅師兄弟經濟學者曾澍基最近去世，佢都有份到場致意。

另一個袁彌昌，就係港大政治與公共行政學系名譽助理教授，主力研究國際關係。本來學者加入中策組做特邀顧問冇乜特別，但其實佢另外一個身份，就係激進泛民政黨、人民力量主席袁彌明嘅兄長，但政壇中人都知，佢哋兩兄妺政見一向都唔同。

其實，政府點解搵兩個同泛民有關嘅人，都唔直接搵學聯中人，例如喺佔領行動走在最前線嘅學聯秘書長周永康，又或者激進泛民加入呢？呢方面唔使畫公仔畫出腸都知喇！

至於王沛詩係任職大律師、港大校董會成員，仲係中華總商會立法會議員廖長江嘅太太。不過，當年佢任職監警會及平等機會委員會委員時，都曾經發生過一啲風波。