政客收錢護淫媒 狼狽為奸禍香江

話說淫賤黎寓所同將軍澳壹淫媒總部，早前被人投擲燃燒彈，警方仲未完成調查，動機未明，反對派政客毛孟靜就迫不及待跳出來護主，煞有介事喺立法會提出休會辯論，仲夾硬將事件同新聞自由扯埋一齊，簡直九唔搭八。

俗語話，無事獻殷勤，非奸即盜。毛孟靜被指曾收受淫賤黎五十萬元秘密捐款，仲未交代得清楚，依家又公然替淫賤黎出頭，如果話當中冇蠱惑，細路仔都唔信喇。有議員質疑佢發言前冇申報利益，佢仲死撐話立法會相關委員會已裁定有關投訴唔成立喎。

其實，所謂投訴唔成立，係指佢事發時仲未當選立法會議員，唔等於佢冇收過政治捐款。嗱，連淫賤黎都親口承認畀咗錢，點到佢唔認數吖。有議員就鬧得啱嘞，毛孟靜「並非為新聞自由發聲，而係為自己友發聲」。

冇錯嘞，為自己友發聲嘅仲有工黨議員李卓人，佢對收取淫賤黎一百五十萬元捐款直認不諱，但就話發言係為新聞自由，同收錢無關喎。喂，咪扮嘢喇，立法會咁多民生議題唔討論，呢對黑金男女偏偏「毛李取鬧」，食咗狗糧，一味亂吠，咁都話同收錢冇關？正所謂，物以類聚，人以群分，反對派政客同淫賤黎狼狽為奸，禍亂香港，大家都知係乜嘢一回事喇。

話時話，今次已經唔係反對派政客第一次替淫賤黎保駕護航o架喇，最無恥嗰位係收咗幾百萬元秘密捐款嘅「民主阿婆」，公然幫爛果報乞廣告，而且由香港乞到去英國添，問你服未。

老實講吖，淫賤黎作惡多端，爛果報宣淫販賤，周圍都係牙齒印，被人投擲燃燒彈一啲都唔出奇，奇就奇在反對派政客忠心護主，醜態百出。正如有議員質疑，畀人偷報紙、抽廣告、淋屎淋尿、擲燃燒彈，鋪鋪都話同新聞自由有關，根本就係捕風捉影。

計太一叮話齋，捕風捉影仲係事小，涉嫌違反《防止賄賂條例》先至事大。反對派政客收錢護主，賊喊捉賊，利益衝突嘅嫌疑水洗都唔清。係呢，廉署立案調查黑金醜聞已大半年，究竟查成點呢？唔通又係好似查貪曾咁一拖再拖，不了了之？叮！