政壇：搞搞政：岑敖暉爆姊弟戀網民心碎
學聯秘書長周永康（Alex）早前先話將負笈海外進修，轉個頭，曾被質疑同佢有斷背戀嘅好兄弟、兼學聯副秘書長岑敖暉（Lester）即傳出新戀情，難道周、岑「情海」翻波？當事人迄今未見回應，但Lester同有「九十後社運女神」之稱嘅前學聯副秘書長何潔泓（Willis）嘅姊弟戀傳聞，已引發網絡口水仗！
設計圖片及對白
傳女方未「換畫」
佔領行動期間，好多女粉絲都對Alex同Lester存有無限幻想，更將二人惡搞成「Alexter」，依家兩人涉及參與、煽動、召集及組織非法集結罪，同時變咗落難孖寶。只不過，官司都唔影響兩人各有發展，一直報稱單身嘅Lester幾次被拍得同Willis行街兼撐枱腳，近日更有網民踢爆「我見到Lester拖住個女仔喺九龍塘港鐵站行得勁快！！！」傳聞嘅大熱人選咪係Willis囉。
我哋搵過當事人甚至Alex求證，但未回覆。網民就有人呻不堪打擊，直言「唉，大地震，心碎了」，亦有網民唔信係事實，質疑「係咪拍拖呀，同男仔定女仔先」；有網民提醒「請記住你不是他的誰，其實他根本沒義務要將自己的私人生活向大眾交代」。我哋問過社運界中人，有人話Willis有固定男友，未見「換畫」，而Lester似乎仲係單身。Lester應該盡快澄清，唔係就背負「勾二嫂」罪名喇！
