為助釋囚重投社會，社區參與助更生委員會主席蕭楚基計劃發動商界僱主提供更多新職位空缺，又構思成立釋囚家屬支援小組，幫助釋囚重過新生。

海皇粥店集團執行董事蕭楚基，十年前開始聘用更生人士，當中年紀最輕嘅釋囚，只有十多歲。相處多時，令佢對釋囚完全改觀：「佢哋好珍惜一個改過自新嘅機會，工作時分外投入認真，返工永無遲到或早退，唔少人工作一年後，仲畀其他老闆挖角。」不過，佢坦言唔少釋囚搵工時常被僱主「壓價」，令佢哋感到氣餒同失望。

為打破社會歧視，蕭楚基將發動一連串為釋囚而設嘅招聘活動，呼籲各行各業僱主加入行列，亦盼僱主請人時一視同仁。佢又構思成立釋囚家屬支援小組，讓家屬互相鼓勵，紓緩情緒困惑。

第一手消息請下載on.cc東網iPhone/iPad/Android/Windows Phone Apps