政壇：民陣谷遊行 擺傅振中上枱
民陣明日搞遊行，通常遊行途中，都會有好多團體擺街站籌款，近年就多咗反對團體喺沿途擺街站，抗議泛民。民陣尋日開記招公布遊行詳情，副召集人楊政賢（Johnson）話收到消息，聲稱「愛港之聲」及「保衞香港運動」會分別喺銅鑼灣百德新街及灣仔修頓球場擺街站，點知觸動咗保衞香港運動發起人傅振中嘅神經。
楊政賢（圖）同傅振中真係似樣？邊個靚仔啲呢？
傅振中
傅振中即時發出「嚴正聲明」，話佢哋等四個團體，明日早上會喺尖沙咀鐘樓搞花車巡禮，唔會去灣仔，對民陣感到極之憤怒，話民陣係想藉住做假新聞，催谷遊行人數博宣傳，要求Johnson向公眾致歉喎！至於愛港之聲都話明日唔會擺街站。Johnson就話，係警方話畀佢哋聽有關嘅消息，民陣唔需要去抹黑。
講開又講，其實近期有人話Johnson同傅振中兩個好似樣。Johnson一聽到就話「唔係吓嘛？我靚仔過佢咁多！」反寸話自己係「捍衞香港運動」。咁又難怪，Johnson喺社運界出名貪靚，況且傅振中大佢咁多，而且又係對家，接受唔到都唔出奇嘅。
