樓市熾熱，華懋尋日出售大潭紅山半島嘅樓盤，紀惠集團行政總裁湯文亮同佢個千金湯振玲Jacqueline專程去到華懋喺荃灣總部嘅商場售樓處，原來係Jacqueline作人生首次置業，由於係頭籌，又係首次置業，獲享稅務優惠，用咗大約八千五百萬，一口氣掃咗四個單位，包括第三座兩個頂層天台戶，及六樓全層，連同六個車位。今次至少慳咗三百幾萬雙倍印花稅。

湯振玲

Jacqueline話，依家居屋呎價都要過萬，佢啱啱買嗰個六樓單位只喺二萬蚊一呎，同埋爸爸一向有投資「磚頭」，佢問過爸爸意見，爸爸都話個價好抵，仲有呢區校網好，睇好單位升值潛力同租務市場，所以咪買幾個單位收吓租囉。佢仲話，本來想揀五間，最後揀咗四間。四個單位同一個契，真係抵。

Jacqueline係叻女一枚，當年會考攞六個A三個B，拔尖入讀科大王牌課程「環球商業管理」，二○○六年大學畢業加入跨國投資銀行，年薪幾十萬，但佢無耐就返家族公司幫手，依家已經係紀惠集團執行董事。紅山半島首批賣五十伙，折實平均呎價二萬零八百九十九元，尋日先賣二十二伙，結果賣咗二十一間。

第一手消息請下載on.cc東網iPhone/iPad/Android/Windows Phone Apps