政壇：為食公子學燒乳豬
馬會大董葉澍堃有個為食公子葉瀚華（Ian）對美食好着迷，搞到有高薪大律師唔做，近年走去搞飲食，仲走入廚房，對住火爐學燒乳豬添！
葉瀚華一身廚師裝束，好認真咁學燒乳豬。（互聯網圖片）
Ian喺社交網站上載咗一張相，見佢一身廚師裝束，戴上勞工手襪，聚精會神學燒乳豬，鬼咁認真，但味道係點就唔知喇。Ian透露，有朋友幫佢改咗個花名叫「大鼠」，話佢天生味蕾敏銳，食物經佢試味，就可以講出用咗咩主要材料。佢又自爆有次大宴親朋時，覺得煮好嘅醬汁唔多對辦，打算再煮過，點知激到等食嘅朋友紮紮跳，教佢凡事係冇完美嘅，掌握時間先至係最重要。講開又講，佢爸爸又係鍾意歎美食嘅人，今次阿仔親自學燒乳豬，睇怕屋企人都要做白老鼠囉。
