政壇：歡歌快舞 東華人賀院慶
東華三院日前舉行慈善晚宴，今年大玩主題「在一起一百四十四年了」，新舊東華人聚首一堂，包括東華三院歷屆主席會主席孫秉樞、前主席王忠桐、陳聖澤等，數百位政商界名人撐足全晚，場面墟冚。
施榮恆（右一）帶隊玩快閃舞，總理李曠怡（右二）、楊嘉成（左二）及曾慶業（左一）跳得落力。
本來買咗機票飛巴黎公幹嘅東華三院副主席陳祖恒同太太Esther，卻因為擔心恐襲殃及池魚，臨飛前一天決定取消行程。懷孕七個多月嘅Esther為咗餐廳業務搏到盡，腹大便便，都打算照飛巴黎採購食材及餐具，佢笑言本來打算出發去當地公幹，無奈恐襲過後氣氛緊張，聽聞唔少名店有荷槍實彈嘅士兵把守，最終作罷。
東華三院主席施榮恆（Ivan）搵來著名舞蹈家王廷琳編咗隻快閃歌舞，叫埋董事局成員一齊跳，載歌載舞跳足兩分鐘，舞伴仲有逾百位東華三院學生、旗下復康中心弱能人士及長者等，眾人由台上快閃到台下，嘉賓都受熱烈氣氛感染，熱烈打拍子回應。Ivan話，希望以歌舞融化人與人之間的冷漠，唔好吝嗇笑聲，笑多啲，開心多啲喎。
勁歌熱舞過後，一班董事局成員嫌未夠喉，鬥飲威士忌，輸咗嘅要捐錢，結果由前總理譚鎮國奪冠，總理廖偉麟就得第二名，各人獲獎名貴威士忌一支，拎返屋企慢慢歎。
