政壇：亞視平價落廣告 發叔變身白武士

自從搬入沙田石門新大樓，鄉議局就陷入長期財困，去年底先計劃劏開大樓地下停車場，出租「撲水」，但如意算盤未打得響，上周二，佢哋開會通過執委廖書蘭建議，喺亞視落賀年廣告，呢次亦係鄉議局咁多年首次。據知，歷時五秒嘅羊年恭喜發財廣告套餐，年三十晚至年初七播足五十次，都只係二萬八千元，認真抵玩，部分更安排喺黃金新聞時段播出添。聽聞鄉議局連祝賀語都諗好，打算祝全港市民羊年和氣生財、身心安泰咁話。

李居明指點風水催運

其實區區二萬八千元嘅廣告費，對亞視嘅救亡真係得啖笑，鄉議局若真係有心撐亞視嘅話，其實都唔係冇招嘅，有人就話，鄉議局大把故事喇，拍吓《尋找鄉紳的故事》，甚至搵齊二十七鄉鄉事委員會主席每日輪流開咪分享鄉情，都好過癮喎。

講到救亞視，堪輿學家李居明尋日就現身亞視大埔總台，商討為亞視做節目。問佢係咪出手幫助亞視？佢就話：「你知啦，好多嘢，睇下啦，盡力，（拍攝風水節目？）未知，未決定，再見！」雖然李師傅好口密，但據知佢同亞視執行董事葉家寶係大學同學，故主動聯絡老朋友給予幫助，順道為亞視睇睇風水，給些建議指點一二。葉家寶就話，同李居明喺節目上有合作，下周一公布。據聞李師傅在亞視附近種了幾棵羅漢松，似為亞視催運。