空氣污染爆燈 跑手淪吸塵機
「香港馬拉松賽敗給空氣」，呢個係內地報章嘅頭版通欄標題，係就係有少少誇張，但亦講出香港空氣質素惡劣嘅事實，「動感之都」淪為「污染之都」，導致馬拉松賽搞出人命，既係健兒嘅不幸，更係香港嘅恥辱。
係咁嘅，日前舉行嘅渣打香港馬拉松賽，由於空氣質素欠佳，參賽者淪為「人肉吸塵機」，結果千幾人感到不適，其中一人死亡，令呢項一年一度嘅國際盛事蒙上污點。其實，主辦單位為避免潮濕天氣影響健兒發揮，已經將賽事提前喺一月下旬舉行，而且連路線都改埋，希望有利跑手發揮，點知人算不如天算，比賽當日唔止濕度高，空氣污染亦幾乎爆燈，連以耐力見稱嘅非洲跑手都叫苦連天，本地跑手更唔使講喇。
呢，本報記者喺賽事期間使用便攜式監測器測試，發現沿途嘅微細懸浮粒子（PM2.5）平均濃度遠遠超過世衞標準，最嚴重嘅時候超標達十一倍，直頭好似「毒氣室」咁，點可能唔出事吖！
有關注團體建議比賽前提早封路或者擴大封路範圍，甚至喺比賽前幾日實施「無車日」，以便有足夠時間畀殘留污染物散去喎。冇錯，呢招內地經常使用，每逢舉行大型活動就限制車輛行駛，可惜治標不治本，一恢復通車，霧霾即刻返嚟，根本止唔到咳。再講吖，香港交通繁忙，根本冇可能實施「無車日」。
話時話，香港空氣污染早就唔係新聞，日前國際機構發表最新宜居城市榜，香港由舊年全球第十七位跌至今年第三十三位，空氣質素差就係其中一個主要原因。正因為空氣質素差，居住環境惡劣，唔少外國公司及人才望而卻步，令香港競爭力每況愈下，被新加坡拋離九條街。
冇計喇，港府搞環保一味大隻講，唔係雷大雨小，就係虎頭蛇尾。好似前年推出嘅新空氣質素健康指數咁，話就話取代用咗近廿年嘅舊指數，但標準寬鬆，莫講話唔符合世衞標準，甚至連內地都不如，你話空氣質素有乜可能改善吖？前特首曾蔭權爵士就係因為治污無能，淪為被通緝嘅「氣候逃犯」，講起真係醜死怪。
無論點都好喇，保護環境人人有責，尤其港府更加冇得卸膊，如果再唔諗辦法切實改善空氣質素，唔止國際人才望而卻步，遲早連馬拉松賽事都要摺埋吖，叮！
