為咗保持身體健康，運動唔少得。早前灣仔體育總會舉行會所開幕儀式，總會主席林貝聿嘉、會長湯文亮廣邀城中好友到場見證，包括熱愛運動嘅合和集團創辦人「哥頓」胡應湘嘅太太胡郭秀萍同馬會副主席周永健等人，眾人講起做運動，各有喜好。哥頓太出名係跳得之人，但佢笑笑口話，已冇跳舞一排，最近改為同老公跟教練健身咁話。

胡郭秀萍（中）、創興銀行新抱廖湯慧靄（左）同廖偉芬齊出席開幕活動。

李麗娟話跳舞可以鍛煉筋骨，冇咁易扭親。

湯文亮（左）同湯振玲經常父女檔拍住練跑。

李麗娟鍾意跳Zumba舞

講講吓，哥頓太大爆周永健嘅太太舞功高強，周永健就賣口乖話要開始學跳舞至得，事關佢條腰唔夠靈活，跳唔到韓國潮舞「K-POP」喎！前高官「媽打」李麗娟都有到場，佢近年鍾意跳拉丁風格嘅Zumba舞健身，感覺冇咁容易扭傷手腳，平衡力都好咗。佢見新會所裝修得咁靚，笑稱已約咗好友每個星期都嚟呢度練舞添！

湯振玲夜跑驚聞猩猩叫

講番新會所，總會早年向政府申請喺摩頓臺天橋底設立會所，並獲賽馬會慈善信託基金資助，依家新會所終於落成，梗係開心晒。湯文亮女兒兼仁濟醫院總理Jacqueline湯振玲都在場，佢除咗熱愛踩單車外，近排仲愛上行山、越野跑步等運動，但早前就遇上驚慄事件。話說佢同哥哥一齊參加一項慈善越野跑步比賽，兩兄妹接力跑夜晚時段。Jacqueline話當佢途經馬騮山時，當下四野無人，佢聽到類似猩猩王咆哮嘅聲音，嚇到腳軟，差啲要打電話搵超前嘅哥哥求救喎。

第一手消息請下載on.cc東網iPhone/iPad/Android/Windows Phone Apps