政壇：搞搞政：狄志遠撐「袋住先」 白鴿黨割席爆內訌
政改民意關注組成員兼白鴿黨黨員阿Dick狄志遠，早前就以中央政策組非全職顧問身份獲邀訪京，同全國港澳政策研究會會長陳佐洱、基本法委員會委員饒戈平見面，之後又同政務司司長林鄭月娥會面傾政改。日前佢又喺電台節目中話，感覺到中央難就人大「八三一」決定有大改動，而民調亦都反映市民接受對政改「袋住先」，認為泛民應該聽吓民意，先接受方案，待二○一九年再重啟政改。點知呢番言論一出，隨即引起白鴿黨內訌。
設計圖片及對白
出遺憾聲明劃清界線
首先係一早揚言要喺立法會否決方案嘅白鴿黨旋即出聲明狠批，話對阿Dick嘅言論感到遺憾。老鴿「高達」李永達仲揶揄阿Dick唔知係咪想做官，仲上綱上線話佢係北京嘅傳聲筒，早已經唔當佢係民主派。其實早喺三年前阿Dick撐政府推行國民教育，搞到白鴿黨備受批評，已有人不滿佢累街坊，所以今次可能為免重蹈覆轍，就急急出聲明同佢劃清界線。
溫和派斥冇言論自由
雖然白鴿黨怒插阿Dick，但亦有一批溫和派睇唔過眼，覺得領導層愈行愈激，就算要出聲明都可以淨係話不同意狄志遠言論，唔使用到「遺憾」咁嚴重嘅字眼，質疑係咪想逼人退黨，又話該黨以民主派自居，但就冇言論自由。有資深白鴿黨員甚至質疑份聲明冇諮詢過黨員，又認為白鴿黨要否決政改方案嘅決定都未喺會員大會通過，阿Dick都唔算違反黨紀咁話。
不過，身兼白鴿黨中委兼立法會黨團成員嘅立法會議員黃碧雲就解畫，話黨團有傾過份聲明，黨主席劉慧卿亦都知情，份聲明係由中常委批嘅，佢哋覺得狄志遠嘅言論唔代表黨嘅立場，所以要表態澄清咁話。
