政壇：建制玩分流決戰泛民響鐘狂
中聯辦將會喺下星期三即二月四日傍晚舉行新春酒會，所有建制派立法會議員都獲邀出席，但適逢立法會當日都要舉行會議，加上要討論由工黨阿Cyd何秀蘭提出有關「撤銷人大常委決定、重啟政改程序」嘅無約束力議案，預料泛民主派到時一定會有動作，唔會畀佢就咁講完就算。不過，據聞建制派早已諗定辦法，確保到時唔會因為去晒參加酒會而出事。
話說中聯辦今年提早喺新年前舉行新春酒會，諗住唔會撞其他新年活動，但就同立法會大會撞到應一應。由於新春酒會係建制派一年一度嘅重點活動之一，建制派中人定要畀面到賀，不過立法會依家幾乎每次開會都會響鐘點人，唔少建制派議員收到請柬後已經大傷腦筋，擔心佢哋呢頭出席酒會，拉布議員嗰頭喺立法會要求數人，到時分分鐘會因建制派出席人數不足流會。
雖然有建制派覺得泛民未必會喺下星期三響鐘拉布，不過阿Cyd當日將會提出要求撤銷人大常委八三一決定，重啟政改五部曲嘅議員議案，而根據立法會當日議程，預計傍晚就會開始討論阿Cyd嘅動議。由於泛民主派對呢個議案非常緊張，到時一定會出盡法寶要求多啲人留喺會議廳聽佢哋講嘢，有泛民甚至揚言到時會不停要求響鐘，等班建制派疲於奔命咁話。
葉國謙協調分批出發
不過，你有張良計，我有過牆梯，建制派亦已諗定招數應對，就係到時會分批出席新春酒會。有建制派議員透露，佢哋已經將全體建制派議員分成七至八個一組，到時會分批出發，一批人返到立法會，另一批先至出發去酒會，確保有足夠法定人數留喺立法會，等泛民嘅計仔無咁易得逞喎。係咪萬無一失就要睇下建制聽唔聽話，同埋負責協調嘅葉國謙有冇甩漏？
