未入正題之前,同大家重溫一個歷史典故。話說末代皇帝溥儀登基嘅時候只得三歲,你知啦,典禮鬼咁繁複,細路坐唔定,咪起勢扭計囉,佢阿爸攝政王載灃情急之下,安慰話「唔使急,快完了」,結果清朝果然好快就完蛋,都咪話唔邪門!

太一叮之所以講番呢段古,係因為今時今日嘅香港,同呢一幕真係驚人地相似。大家應該記得,本報獨家踢爆前特首曾蔭權爵士「貪遍省港澳,歎盡海陸空」嘅連串醜聞,眨吓眼三年就快過去嘞,案件至今仲係無影無蹤。有立法會議員尋日忍唔住質問律政司刑事檢控專員楊家雄,對方話廉署已經完成調查,稍後會決定係咪作出檢控喎。議員跟手問單畸士係咪已經接近尾聲呢?楊家雄就話「快完了」。

唔係啩,又係「快完了」?唔知嘅仲以為睇錯咗份舊報紙呀!早喺前年八月,當時即將離任嘅前刑事檢控專員薛偉成已經實牙實齒話調查「快完了」;到舊年五月,法律界同政界流傳貪曾案結案在即,律政司又係話同廉署緊密溝通喎;到依家,律政司仲係重彈「快完了」老調,咁即係點?即係要求市民繼續等囉。

講真,貪曾案情節唔算複雜,而且鐵證如山,拖到依家都未了結,唔單止市民諗唔通,連前刑事檢控專員江樂士都話「匪夷所思」。到底係官官相護,有意放生,定係阻力太大,吹佢唔脹呢?當局與其大玩拖字訣,做場大龍鳳呃市民,倒不如老實話因為「證據不足」放棄檢控好過喇。

講到貪曾案石沉大海,港府對付佔領運動一樣畏首畏尾,先係有法不依,繼而將一眾牛鬼蛇神放虎歸山,家陣仲鬧出「預約拘捕」嘅笑話添。事實擺在眼前,所謂法律面前人人平等係假嘅,法律面前牛鬼蛇神更加平等就真,當局對漢奸餘孽高高舉起,輕輕放下,講到底都係驚咗佢哋背後嘅洋人。所以話啫,貪曾嘅「先見之明」真係唔到你唔服,佢老哥死都唔肯放棄英國爵士嘅銜頭,咪就係買定保險囉。

話時話,內地打虎拍蠅不亦樂乎,雷厲風行,老百姓拍手稱快。人哋內地貪官位高權重,就話係大老虎啫,貪曾之流頂多只係大老鼠一隻,港府始終奈佢唔何,簡直莫名其妙。點講都好啦,市民嘅容忍係有限嘅,民怨一嘢爆發咯喎,港府分分鐘步清廷後塵,好快玩完嘅咋!

第一手消息請下載on.cc東網iPhone/iPad/Android/Windows Phone Apps