城中鏡：徐立之出手助珠海正名

唔少專上學院都想正名為大學，珠海學院係其中之一，香港大學前校長徐立之表明，樂意喺未來日子，為珠海學院申請正名獻出一分力，加上分享個人經驗，希望可以減少走「冤枉路」。佢又同珠海教職員分享當年喺港大嘅「三方」概念，即係學生、職員同校方，認為各方都應該不分彼此，有商有量。

徐立之同珠海教職員分享當年港大嘅「三方」概念。（資料圖片）

身為珠海學院校董及學術委員會主任嘅徐立之，早前談及本港私立大學發展時又話，其優勢在於自主同靈活性強，又以船隻遇上冰山為比喻，公立大學受制於很多既定規條，而規模細嘅私立院校就靈活得多。

話時話，正名大學之路係漫漫長路，就以香港教育學院為例，○八年開始出任教院校長、現任運輸及房屋局局長張炳良，直至一二年中離任校長時，教院仍未正式獲批准升格做大學，今次珠海即使有徐立之出手協助正名，似乎都要有心理準備，唔係一時三刻就可以達成目標。