前日舉行一年一度嘅馬拉松賽事,吸引城中唔少做開運動嘅政商界名人參加,其中教育局前政治助理楊哲安今年係第五年參加,佢自爆以前唔鍾意長跑,反而享受短跑嘅爆炸力,直到二○○一年喺倫敦被同事挑戰,及後勤操半年,並喺當地參加全馬賽事後感覺良好,回港後就繼續參加馬拉松賽事。

楊哲安再次參加馬拉松賽事,爸爸楊孝華(右)、太太張新悅(左)等齊齊現身打氣。(互聯網圖片)

五指鞋(互聯網圖片)

楊哲安當日着住嘅跑鞋亦有名堂,就係叫做「五指鞋」,佢透露着五指鞋需要時間適應,頭半年都好唔習慣,跑約二百米已經想抽筋,但後來着得耐就感覺,小腿同腳掌等平日少用嘅肌肉部分都發達咗,連帶着鞋號都變大咗,笑言要換過批新鞋咁話。

中華廠商聯合會青委名譽主席Irene周雯玲同副主席劉子芸、黃大仙區議員丁志威、理文造紙首席執行官李文斌等名人都有參加馬拉松賽事。今年跑十公里賽事嘅Irene話跑步時節奏好緊要,又話聽住快歌跑,可以令自己冇咁易攰同放棄,期望明年有機會挑戰半馬賽事。

第一手消息請下載on.cc東網iPhone/iPad/Android/Windows Phone Apps