城中鏡：名媛講買衫要潮唔要花
雖然距離農曆新年仲有三個星期左右，但政商界名人開始陸續辦年貨同買新衫，撞啱日前有服裝品牌喺沙田馬場舉行盃賽，一眾城中名人就大談佢哋添置新裝嘅準則，其中罕有現身馬場嘅利豐集團榮譽主席馮國經嘅女兒Sabrina馮詠儀，以一身黑色長裙配襯藍色帽同飾物亮相，佢自言每次着衫重點唔使多，好似佢知道呢日會戴幾件藍色飾物，就會盡量揀條淨色嘅裙，等人望落唔會太花。
馮詠儀話每次打扮揾一種重點顏色已經足夠。
林李婉冰（右）同女兒林嘉寶齊齊出席活動。
陳湛全（右）有時會幫太太葉鳳屏揀衫。
當問及有冇買新衫畀老公時，Sabrina話揀男人衫好有學問，除咗要清楚對方品味同性格，仲要夠啱身，事關女人嘅高踭鞋只要靚，就算緊都會照着，但男人買鞋如果刮腳或件衫唔舒服，就會擺埋一邊。
林李婉冰為子添衣考功夫
名媛Nina林李婉冰同女兒林嘉寶齊齊以黃色元素嘅打扮亮相。Nina透露間中會幫兩個仔買衫，而最困難嘅係兩個仔着衫風格唔同，一個鍾意淨色，另一個就鍾意玩款式，有時買咗畀佢哋唔啱，就惟有拎番去換另一個款，或者送畀人，加上衣着口味不時會變，佢笑言要定時留意住個潮流。
同場現身仲有荃灣區議會主席陳耀星嘅仔Charles陳湛全同太太葉鳳屏。Charles話好鍾意着格仔恤衫，又欣賞日本西裝剪裁特別適合東方人身形，細節位亦較多，至於歐洲嘅西裝就傾向多啲色彩，好似紅色或綠色褲咁，以往好少本地人着，近年就多咗港人接受喎。
