今年係公文袋創黨九周年,過往數年嘅三月底、四月初,佢哋都會喺尖沙咀一間酒店搞籌款晚宴,事前會周圍呼籲有心人捐出貴價紅酒同畫作,等佢哋喺晚宴上搵人「揼心口」捐錢,但今年情況疑一反常態,直至目前為止,公文袋依然未有任何搞籌款晚宴嘅打算。

(設計圖片及對白)

據聞公文袋內部之前傾過今年搞唔搞籌款晚宴,唔少執委認為舊年經歷政改爭議同佔領行動,唔少黨員已經忙到有氣無碇抖,再搞籌款晚宴真係「有心無力」。

公文袋發言人證實,該黨暫時未有搞晚宴嘅打算,又話雖然每年都會慶祝黨慶,但就唔會年年大搞,今年暫時亦無大型籌款活動,但其後又留有一手話,要黨內再傾吓先至可以作最終決定喎。

歐飛暫代「大內總管」

不過,籌款晚宴一向係各政黨吸水嘅大好機會,好似白鴿黨原本計劃舊年十一月搞籌款晚會,但因撞正佔領行動,押後至下月繼續舉行,由始至終都無諗過籌款活動,而事實擺在眼前,如今佔領行動已經告一段落,公文袋竟然仲可以此為由唔搞籌款晚宴,真係信不信由你,更加令人懷疑背後係咪有不可告人嘅原因,甚至係另有內情。

此外,公文袋仲面臨人才荒,事關該黨原總策劃幹事黃晙涉非禮案,早前由英國讀完書嘅歐陽志飛(歐飛)臨危受命暫時做住總策劃幹事一職,但據聞歐飛做到今年三月就會離職,該黨依家都未諗定「替補」人選,公文袋即將人財兩失。

隨着年底區議會選舉近,公文袋中人既煩緊選舉部署,依家仲要忙住搵人做「大內總管」,黨魁「袋巾傑」梁家傑要諗吓計收拾呢個局面嘞!

第一手消息請下載on.cc東網iPhone/iPad/Android/Windows Phone Apps