內地富戶喜愛到世界各地購物,但投資習慣就唔多「國際化」,連投資信仰都傾向傳統「Cash is King 」。嘉信理財同清華大學舊年合作搞嘅「中國城市內新興富裕投資者研究」尋日出爐,結果顯示,超過百分之八十內地富戶仍停留喺內地投資,百分之八十九最愛現金,仲要百分之八十都會買磚頭。調查又發現,三成四受訪富戶都唔多信理財顧問。

Lisa Kidd Hunt(右)話內地富戶喺多元化財務投資進程有待改善。

嘉信理財同清華大學舊年年中訪問咗七百一十四位上海、北京嘅投資者,家庭年收入約四萬美元至八十萬美元,兼擁有一百萬美元以內嘅可投資資產。不過,內地富戶理財都親力親為,因有百分之三十四受訪者都唔多信理財顧問,投資前若要做功課,有百分之四十三受訪者仲用緊傳統資訊途徑包括睇報紙,遠高於微博同微信、網誌同論壇等電子途徑。雖然家陣內地互聯網看似發達,但只有百分之三十七受訪富戶經網上投資咋!

嘉信理財國際服務及特別業務拓展部執行副總裁Lisa Kidd Hunt就話,約百分之八十三受訪者只喺內地投資,喺存款以外資產類別中,亦以中、港股票投資較受歡迎。所以內地富戶喺多元化財務投資進程,尤其其他投資工具、內地以外嘅地區投資上有待改善。

第一手消息請下載on.cc東網iPhone/iPad/Android/Windows Phone Apps