政壇：投資企業佔優方方睇好
舊年初辭去摩根大通投資銀行亞洲區副主席嘅方方，好耐冇喺香港「蒲頭」，尋日佢出席一個投資論壇時，就話近期除咗喺大學擔任導師外，就為家族進行投資活動。唔講唔知，原來喺今年一月十五日，方方已獲政府委任為新一屆策略發展委員會嘅成員之一。佢仲話依家「都有成日喺香港呀」。但畀人問到廉署單「官二代招聘」調查進展時，佢就耍手擰頭話，「冇嘢，冇嘢。」依家方方喺工作上有新開始，希望呢件事唔會對佢困擾太耐啦！
方方話依家投資企業好過投資創投基金。（資料圖片）
講到投資，方方話投資企業好過投資創投基金，主要係市場有大量資金追逐少數較具質素嘅創新企業，依家做企業，較創投基金有優勢，佢又講到有創業公司喺短短六個月內，估值已大升一倍，好和味。
另外，同場仲有暢銷書《新創企業之國：以色列經濟奇蹟的啟示 》作者Saul Singer，佢覺得中國依家好多新發明同技術，舉個例，佢話小米「very innovated（很創新）」，而且只係蘋果同三星一半價錢，但電量更大。其實，除咗雷軍之外，世上好難搵到覺得小米創新嘅人，Saul Singer嘅一席話，雷軍聽到，一定感動到淚流滿面。
