政壇：政府唔提噪音光污染捱鬧
有立法會議員最近接獲東區海底隧道對面嘅油麗邨居民投訴，每晚慘被隧道口發出嘅強光滋擾，搞到「無覺好瞓」，促請政府明年收回東隧經營權時要改善問題。環境局副秘書長劉明光就話，負責研究光污染嘅戶外燈光專責小組未來數月將向政府提交報告，就立法規管光污染提出建議。
王國興斥施政報告無提及規管噪音同光污染問題。
黃錦星尋日喺立法會簡介施政報告嘅環保政策時，遭議員批評。
環境局局長「星星」黃錦星尋日喺立法會環境事務委員會簡介施政報告嘅環保政策，佢話環境局今年底將喺銅鑼灣、旺角同中環設立低排放區，限制歐盟三期或以下嘅專營巴士駛入有關區域；又指政府舊年推出嘅逾百億元更換歐盟四期以前嘅商業柴油車計劃反應正面，計劃推出首十個月已淘汰咗二萬一千部車輛，佔整體淘汰車輛的四分之一。
講到好有成效咁喎，但咪開心得太早，事關工聯會嘅議員「阿王」王國興就將佢軍，批評施政報告無提及規管噪音和光污染問題，杏花邨居民飽受噪音滋擾逾十年，促請當局投放資源改善。環保署副署長謝展寰坦承，正為四十個噪音嚴重嘅道路加裝隔音屏，但包括杏花邨在內嘅二十一條道路尚未動工，會爭取加快工程上馬，並研究在道路試用隔音成效更佳嘅物料。早前喺房屋署屋邨加裝隔音窗，有效減少七個分貝噪音，視乎試驗成效，再考慮擴至其他新屋邨。
