政壇：周永康出外讀書有後路？

其實早有消息話，Alex喺佔領行動期間，已獲外國大學獎學金，等佢唔使愁後路，不過佢強調無咁嘅事，未來半年就要諗吓申請外國邊間大學。當問及會否擔心佔中惹上官非而留有案底，甚至未能到外國升學，佢就話唔驚得咁多，只能夠見步行步。

透明度不足 港大恐退聯

不過，Alex唔諗得咁遠住，擺在眼前要先處理嘅係二月九至十三日，正式就港大學生會係咪退出學聯進行公投一事，事關如果公投通過嘅話，港大學生會就唔會再加入學聯，變相令學聯代表性大大降低。

尋日就新鮮熱辣，有論壇喺港大舉行，邀請Alex、港大學生會會長梁麗幗同兩位「港大退聯關注組」成員即場辯論，其中關注組成員多數認為學聯作為八大院校溝通平台，透明度太低，八大院校學生難以進行監察，甚至認為學聯搞到港大學生會失去獨立自主性，唔能夠將港大同學聲音帶入學聯，所以先提出港大退聯。

另一邊廂，一批現場學生則認為，唔需要去到退出學聯呢一步，但係承認學聯無論喺溝通機制同透明度方式，都有改善空間。

Alex發言時話學聯一向實行「共識制」，如有其中一間院校唔同意某立場，學聯就唔會有共識，呢個做法就能避免扼殺少數聲音，希望提出退聯嘅同學深思，係咪退聯就解決到所有問題。

無論今次公投結果係點，毋庸置疑嘅係，學生對學聯同港大學生會嘅不滿聲音逐漸增加，如果學聯唔正視呢個問題，可以預期支持者會繼續不斷流失。