郵政自甘墮落 官僚失信於民
營運出現虧損點算？正常嚟講，梗係改善服務，除弊推新喇。但香港郵政就反其道而行之，唔係千方百計增加收入，反而諗縮數減少服務，咁搞法，盞慢性自殺嘅咋。
係咁嘅，香港郵政長期經營不善，頻頻見紅，淨係過去兩個財政年度咋，就累積虧損過億元，簡直醜死怪。更令人匪夷所思嘅係，郵政官僚口口聲聲話改善服務喎，結果係提早關門拉閘，好多郵局每日縮減營業時間半小時至一小時，你話係咪反智吖！呢，有立法會議員就批評得啱嘞，香港郵政嘅做法係本末倒置，得不償失，等同慢性自殺，因為縮短營業時間只會令生意減少，市民更唔方便，更加唔會幫襯。
「東方報業民意調查」結果顯示，對於香港郵政未有改善服務增加收入，反而縮短服務時間，三成五受訪者直指係罔顧社會需要；兩成四認為係本末倒置；兩成半人認為做法違背政府改善公共服務嘅宗旨。民意昭昭明甚，郵政官老爺收到未呀！
講真，香港郵政服務質素每況愈下，甩漏醜聞不絕於耳，話到尾都係因為郵政官僚尸位素餐，根本冇做好自己份工。上述民調又顯示，兩成四受訪市民認為反映出機構內部管理鬆散；四成二人覺得急需改革；兩成一人認為已經形成惡性循環。
講開香港郵政嘅醜聞，最離譜嘅莫過於涉嫌滋擾東方報業嘅「失信於民」事件。九封地址無誤、郵資冇少嘅信件，竟然被退回，其中一份信件仲被拆開添，如果話其中冇蹊蹺，細路仔都唔信喇。事實上，當局打壓正義傳媒嘅惡行三日三夜都數唔完，今次輪到香港郵政充當政治打手，一啲唔出奇。咁就難怪，事發近三個月嘞，香港郵政調查此案冇晒下文，連句道歉都冇，擺到明心裏有鬼喇。
正所謂，公道自在人心。對於香港郵政涉嫌滋擾東方報業，又冇交代調查進展，四成二受訪者指反映內部管理同營運有問題；兩成二人認為冇認真調查，想不了了之。不過咁，有多位立法會議員已經話到明，此案調查一日無結果，佢哋一定會追究到底，香港郵政玩弄拖字訣，企圖大事化小，不了了之，冇咁易！
香港郵政失信於民，自甘墮落，管理層難辭其咎。計太一叮話齋，縮皮Cut鐘於事無補，不如將啲庸官Cut晒，咁咪唔使諗縮數囉，叮！
