做得政治人物，最緊要係言行一致，否則好易畀人「翻舊帳」，好似尋日一個論壇，一向反佔中嘅律師會前會長Junius何君堯，不點名批評某啲佔領人士無依法辦事，口口聲聲會自首，但去到警署時又唔同警方配合，非常賴皮。

何君堯不點名批評部分佔領人士疑無依法辦事，事後被人「翻舊帳」。

點知論壇結束後，Junius旋即畀人「翻舊帳」，話政府當年呼籲新界有僭建嘅居民向當局自行申報，Junius當時公然呼籲村民唔好申報，質疑Junius同佔領者有關做法有何分別。就此，Junius辯稱係兩回事，因為每個人都有保持緘默嘅權利喎。

袋巾自爆唔聽民意

講番尋日嘅論壇，多名嘉賓繼續就政改立場激辯，其中民政事務局前局長藍鴻震建議泛民於政改「袋住先」，原因係港英時代根本無乜民主；公文袋黨魁「袋巾傑」梁家傑重申唔會就假普選方案「袋住先」，仲話如果係為選票，一早應承通過政改。袋巾傑呢個講法認真耐人尋味，言下之意係咪都知民意係想通過政改，佢只係礙於政治立場先至死撐到底呢？

第一手消息請下載on.cc東網iPhone/iPad/Android/Windows Phone Apps