城中鏡：卿姐談感情嫁咗畀工作

民主黨主席「卿姐」劉慧卿曾經有幾段感情，但從政多年都極少談及私人感情，佢尋日接受立法會議員Ann蔣麗芸訪問時，罕有地提到自己表面上無結婚，但從政多年已經當自己嫁咗畀工作同香港嘅福祉，而且當正全香港嘅小朋友係佢嘅仔女。

劉慧卿（右）接受蔣麗芸訪問，表示自己嫁咗畀工作同香港嘅福祉。（互聯網圖片）

蔣麗芸又有新議員辦事處開幕。

張建宗（左）呼籲，德朗邨居民有需要就搵政府幫手。

倘遇真命天子一切隨緣

阿Ann早前訪問卿姐嘅節目尋日播出，當時佢問及卿姐覺得邊段戀情最刻骨銘心，卿姐起初以唔講私人嘢為由擋駕，但其後先透露有人曾經笑佢已經同工作結婚，又話覺得自己係同香港嘅福祉結婚喎。阿Ann於是繼續追問，話如果卿姐真係遇到真命天子，會唔會接受對方時，卿姐就話自己無乜所謂，一切隨緣咁話。

講開阿Ann，不得不提佢又有新議員辦事處開幕，新議辦今次坐落喺啟德德朗邨，仲邀請到一司兩局，分別係財爺鬍鬚曾、勞工及福利局局長張建宗同運輸及房屋局局長張炳良出席添。

其中張建宗致辭時公然同阿Ann「搶客」，話德朗邨人口約有一萬三千幾人，當中唔少係新來港同低收人人士，係當局重要客源之一，呼籲當區居民如果有任何需要，記得要搵政府幫手。佢其後又趁機多謝鬍鬚曾樂意「大開水喉」，令勞福局得以推行一系列幫助低下階層嘅措施。

立法會主席曾鈺成發言時則話，如果當區居民覺得官員無回應佢哋嘅訴求，可以去議辦搵阿Ann「追數」，又形容阿Ann係最支持政府嘅議員之一，氹到阿Ann笑逐顏開。