泛民主派辭職觸發變相公投喺佔領行動期間傾唔成，直至白鴿黨立法會「超級區議會」議員「AV仁」何俊仁喺本月初突然拋出否決政改方案之後辭職，變相發動公投，要求政府重啟政改五部曲，呢個提議一出，唔單止泛民黨派覺得摸不着頭腦，連白鴿黨內部都有分歧。不過AV仁辭職仲未正式上演，建制派對AV仁揚言辭職已經流晒口水，吼住辭職補選嘅一席。

（設計圖片及對白）

據聞有分析指出，如AV仁喺政改表決前發動變相公投，礙於民意壓力同變相承認公投，建制派都唔敢出招，但依家AV仁計劃喺政改表決後先至辭職，建制派大可當係一場普通辭職補選，既然定性係補選，落場參選又有何不可呢？

再者政改方案一旦被否決，五百萬合資格選民就會失去一人一票選特首嘅權利，到時選民或者會對否決方案嘅泛民有好大反感，建制派分分鐘可以趁住之後嘅補選坐享漁人之利。

中乳鴿冇人識 建制紅人有機

除此以外，建制派參加補選嘅人選較泛民為多，事關身為超級區議員嘅AV仁辭職後，必須係現任民選區議員先有資格披甲上陣，泛民方面數來數去都選擇唔多，而且知名度一般，舉例指白鴿黨如要派「中鴿」，估計將會係屯門區議員陳樹英、葵青區議員尹兆堅等之爭，之後就剩番一批等上位嘅「乳鴿」。

建制派方面，黃大仙區議員陳曼琪、沙田區議員潘國山等都係可能人選，特別係身為律師嘅陳曼琪，早前協助團體申請佔旺區禁制令後知名度急升，加上到時得到建制派齊心力撐，AV仁嘅超級議席畀建制派攻陷唔係無機會。不過，講到底都要獲中央「開綠燈」，否則就眼白白失去呢個議席進帳嘅黃金機會嘞！

第一手消息請下載on.cc東網iPhone/iPad/Android/Windows Phone Apps