政壇：訪德全包宴議員爭崩頭？
立法會議員經常出外考察，但就利用考察前後時間作私人遊覽，因而被指用公帑攞着數。不過，今年三月有個訪問團，係德國政府「全包宴」，邀請佢哋訪問當地聯邦議院。德國政府會全數負責代表團嘅旅費，包括住宿、交通、旅遊保險同膳食等。平時啲議員外訪有公帑資助已經爭崩頭，今次唔使扣佢哋嘅外訪津貼，唔知會唔會爭到打架呢？
話說德國政府本月初透過德國駐港總領事館向立法會發信，邀請議員喺三月一日至六日去柏林同一個聯邦州訪問。德國政府就建議立法會可組成最多九名議員嘅代表團，而訪問行程包括同佢哋嘅選舉、豁免權及議事規則審議委員會、聯邦議院領袖理事會，以及聯邦外交部等部門代表會晤。
雖然今次係德國政府請客，但秘書處都計算咗議員嘅雜項開支，初步估計，九位議員夾埋需要約六千六百元，款項仲要喺議會聯絡小組帳目扣除，可以話係德國政府出雞，議員連豉油都唔使出。
