政壇：真普聯玩完 僅一步之遙
真普選聯盟（真普聯）就嚟執笠喇！二十多名泛民主派立法會議員前年三月下旬，因政改成立真普聯，事隔不足兩年，原來尋日公布嘅新一份關乎全國人大常委會「八三一」決定嘅民調，已係最後一份民調，換言之變咗「絕唱」，而且低調地只係發表新聞稿就算數。據聞其中一名真普聯受薪職員最近都開始周圍搵工，可以預期真普聯或不再活躍，日後要於政改左右大局似乎有啲難度。
（設計圖片及對白）
43%贊同八三一決定
真普聯尋日發出新聞稿，話早前委託港大民意研究計劃，於本月十九至二十一日以電話成功訪問一千多人，了解市民對人大「八三一」決定嘅意見，四成三受訪者表示贊成，人大「八三一」決定等於將二○一七特首選舉變成假普選，有三成表示反對呢個說法，但新聞稿無提到其餘近二成七嘅意見，要睇番原始嘅數據資料，先知道原來當中一成九對呢個說法係「一半半」，另有不足一成表示唔知或難講。
新聞稿提到另一條問題結果亦有類似情況，只係提到三成五受訪者對政改第二階段諮詢建議感到不滿，只有二成二表示滿意，另有四成多受訪者取態，同樣要於原始數據資料先至可以得知，即二成六對此表示「一半半」，另有近兩成表示唔知或難講。
調查新聞稿甩漏多
真普聯其後更疑選擇性披露部分事實，其新聞稿僅提及十八至二十九歲嘅年齡組別當中，有七成四受訪者認為人大決定令香港帶來假普選，無再提及同分析其他群組嘅看法，如果要知道只可以自行睇番原始數據。
連新聞稿都有咁多甩漏，真普聯召集人鄭宇碩承認佢哋以往會委託港大就唔同議題做民調，而今次係最後一擊，日後如無意外唔會再做任何民調。再者，據聞其中一位真普聯受薪職員最近都開始周圍搵工，似乎距離真普聯完成歷史任務，真係一步之遙。
