政壇：搞搞政：乳鴿退任中委 抗議老鬼操控
白鴿黨舊年底選出新一屆領導層，雖然該黨當時力挺一班中委嘅平均年齡唔過三十歲，加上一直控制黨內事務嘅「張李楊集團」（張文光、李永達、楊森）代表宣布唔競逐中常委，令人覺得該黨似乎已改頭換面。不過，該黨元朗區議員張賢登同Roy鄺俊宇卻退任中委職務，據聞兩人不滿「張李楊集團」仍暗中控制黨內行政事務，所以決定退出以示不滿。
設計圖片及對白
疑「張李楊」控制少壯派
白鴿黨中委會前日開會，通過接納張賢登同阿Roy因私人理由辭去中委職務。有白鴿黨中人爆料話，其實該黨喺選出新一屆中委後，黨內唔少第二梯隊見到新一批中委多數係「張李楊集團」分子，已覺得換屆「換湯不換藥」，有人更萌生去意。不過，當時以主席劉慧卿為首嘅領導層不斷游說眾人唔好辭職，費事畀人覺得該黨成日內訌。不過，據聞張賢登依然不為所動，覺得「張李楊集團」持續操控黨內當權少壯派，於是憤然決定退出中委，而阿Roy就同師傅共同進退，一齊遞信。
我哋問過阿Roy，佢話喺聖誕節前已向黨領導層遞信，當時唔少人都有挽留佢，但由於當年係張賢登帶佢入中委，依家師傅要走，佢一定會共同進退。
對於有人質疑Roy係因為不滿「AV仁」何俊仁發動辭職公投而辭去中委，佢就話一早已決定辭任中委，同AV仁事件絕對無關。我哋尋日亦有搵過張賢登，但至截稿前未有回覆。
