政壇：醫界高球賽較技籌善款
唔少商界名人報名參加將軍澳醫院早前舉行嘅第一屆慈善高爾夫球賽，醫院管理局主席梁智仁、食物及衞生局常任秘書長Richard袁銘輝、將軍澳醫院管治委員會主席陳清霞同借出場地嘅清水灣鄉村俱樂部副主席王桂壎等人，一邊較技一邊籌款，話咁快籌得近七十萬元。
黃烱強（左起）拍住陳清霞舉辦慈善高球賽，梁智仁同袁銘輝齊揮桿支持。
今次落場比賽共有二十五隊，好多醫療界猛人齊集，包括聖保祿醫院院長何兆煒、九龍東醫院聯網總監徐德義及將軍澳醫院行政總監譚錦添等，仲有恒和珠寶主席陳聖澤。陳清霞話活動嘅目的係為醫院各項義務活動籌募經費，以便加強社區聯繫同居民服務。醫管局轄下聯網首次搞慈善高球賽，梁智仁都話夠晒新穎，希望日後可以推廣至其他聯網。
「老波骨」袁銘輝 90桿完成
喺球賽用咗九十桿完成賽事嘅Richard好滿意自己成績，笑稱當年喺加拿大工作時，已開始學打高球，眨眼間波齡超過二十年。佢話多年前曾試過一桿入洞，幸好當年波友唔多，兼夾買咗保險，所以「萬歲」時支出有限，唔係就肉赤喇！佢嘅隊友兼賽事籌委會主席黃烱強就取得了個人淨桿亞軍，果然好波又好心。
梁智仁就話四十幾年前已加入粉嶺高爾夫球會做會員，但一直無乜點練波，後來兒子長大後，先至全家一齊去學打高球。佢謙稱自己天分唔夠太太許安璞咁好，大讚太太唔止煮餸叻，球技都好好，仲試過兩次一桿入洞添！
