政壇：長毛寸高佬賢無魚味
之前講過政府突然抽起立法會財務委員會議程上首四項撥款申請，希望財委會可盡快審議創新及科技局嘅撥款申請。財委會尋日開始審議排喺創科局前嘅漁業貸款撥款申請，但由於泛民不滿政府突然抽起部分議程，加上要拖延創科局開始審議嘅時間，佢哋就連關乎漁農業界利益嘅漁業貸款嘅撥款申請都唔放過，不斷「拉布」阻撓，社民連「長毛」梁國雄仲寸爆漁農界議員「高佬賢」何俊賢。
設計圖片及對白
表明唔會畀創科局喺情人節前通過嘅人民力量陳志全，尋日開會時率先發難提出休會待續，批評政府抽走議程係玩行政手段。高佬賢就大呻唔少業界等緊政府筆貸款嚟救命，呼籲泛民玩還玩，唔好攞漁業貸款嚟較飛，希望可以喺新年前通過撥款申請，等班漁民唔使喊住口過年。
李卓人提中止辯論「彈弓手」
但長毛喺發言時就寸爆高佬賢，話佢個樣青靚白淨，個身無魚味又無海水味，淨係有時聞到有陣古龍水味，唔知邊忽似漁農界代表，反而上屆議員黃容根仲似啲。長毛呢番話搞到高佬賢尷尷尬尬話，立法會有唔少議員靚仔過佢，唔覺得自己特別靚仔喎。
保險界陳健波就話依家嘅情況就好似政府同泛民喺漁民屋企入面打架，政府同泛民唔會因為呢件事有任何影響，但一班漁民就損失慘重。佢又批評泛民議員「拉布」一樣有糧出，但人哋漁民成家生活都靠晒個基金，叫泛民唔好為難班漁民。
雖然財委會其後否決休會待續議案，但工黨李卓人又即刻提出中止辯論，企圖拖得幾耐得幾耐。不過，如果「中止辯論」獲得通過，財委會就要開始傾創科局申請，所以佢喺投票前話要撤回有關動議當無事發生過。由於議事規則無寫明撤回中止辯論後可唔可以再提，為防泛民議員喺下次會議再出呢招，財委會主席張宇人於是向在場建制派作出「溫馨提示」，叫佢哋唔好咁易畀阿人撤回動議。
