職業司機用到盡 巴士公司買人命

話口未完，又發生恐怖奪命車禍嘞。話說一輛九巴沿沙田大涌橋路駛往馬鞍山方向嗰陣，突然攔腰撼向對面線一輛的士，再引發數車連環相撞，的士司機最終傷重不治，仲有十九人受傷。警方話喎，巴士司機涉嫌危險駕駛導致他人死亡被捕，正調查係咪有人衝紅燈肇禍。

車禍真相如何，有待警方進一步調查。據講今次事件可能同有人長時間駕駛有關，被捕車長揸嘅係「特別更」，專門喺上下午繁忙時段駕駛，司機早上七點就要開工，踩到中午十一、二點先可以休息，直至下午四點再開工，收工已經晚上九點。換言之，全日工時長達十四小時，你話嘞，金屬都有疲勞嘅時候，何況係血肉之軀吖，吓話？

咪以為中間有得休息好着數呀，正如工會代表話齋，九巴冇休息室提供，司機返屋企匆匆填肚就要趕返嚟開工，連車錢都蝕埋，行內俗稱呢更係「打仗車」，可想而知幾惡頂。工會仲話，公司為咗節省人手，不斷諗縮數，借重組路線為名，「特別更」愈開愈多，不時要司機「朝五晚七」、「朝九晚十一」，實行將司機用到盡咁話。

冇計喇，根據運輸署同巴士公司制訂嘅指引，只要司機每日最長工時唔超過十四小時，工作滿六小時最少有三十分鐘休息時間，咁就符合法例要求，巴士公司攞正牌咯喎，仲唔將司機榨到盡咩。之但係，唔犯法係咪就等如啱晒呢？要知道司機唔止關係到巴士上嘅乘客安全，仲影響埋其他道路使用者，唔夠精神嘅話，真係攬住一齊死嘅咋。

正所謂，子雖不殺伯仁，伯仁因子而死。發生交通事故，司機固然有責任，唔通巴士公司就冇責任咩？呢，前排先有司機投訴，去九巴外判醫療中心睇病後，醫生畀藥唔畀假，搞到司機食藥後昏昏欲睡，差啲出事！今次車禍同司機嘅精神及身體狀況係咪有關，真係要查過先知嘞。

講開又講，巴士公司難辭其咎，負責監管嘅運輸署一樣冇可能置身事外，如果唔係官老爺不監不管，邊有咁多車禍發生吖，叮！