城中鏡：下廚感慨多張宇人嘆常孭鑊
廚房工作辛苦，青年人都唔願入行，飲食業界為此好頭痛，有公司就因應呢個現象，研發自動化爐具幫助業界紓困。立法會飲食界議員張宇人（Tommy）、叙福樓集團執董黃傑龍（Simon）、名廚黃永幟、餐飲聯業協會副主席黃浩鈞都有去觀摩吓啲現代化爐具，仲拎起鑊鏟試用自動拋鑊機。不過，Tommy下廚露兩手之餘，亦藉住個鑊嚟講下自己喺議會嘅處境，仲講到要孭鑊添！
張宇人
黃傑龍話要同老婆分享自己製作嘅炒飯。
黃浩鈞話餐飲業借助科技來營運係大勢所趨。
Tommy話，對住個鑊不外乎係炒鑊、拋鑊同孭鑊，身為立法會議員，就好多時都要孭鑊！因為喺强勢主導嘅政治環境當中，衰嘢梗係留畀議員，尤其係佢身兼財務委員會主席，呢個位特別難做，例如啱啱通過極具爭議嘅三堆一爐之後，又即將要面對周五嘅創新及科技局撥款申請。佢預期當日嘅討論可能會相當激烈，所以要考慮下使唔使買定個鋼頭盔，以防有人掟嘢喎！
黃傑龍與妻嘗拋鑊機炒飯
Tommy講講吓議會工作又乘機解畫，話十多年嘅議員生涯之中，幾乎逢周三都係捨議會而赴馬場，因為佢嘅選民都集中喺馬場，所以佢去馬場只係做好選民工作喎。如果係咁，Tommy真係夠晒勤力，批評佢掛住跑馬嘅人，就真係怪錯咗佢囉！
講番今次爐具示範，自稱入廚房多數係搵食，而非煮食嘅Tommy，廚藝當然較為生疏，但因為有自動拋鑊機，就只須留意食材落鑊嘅分量同次序，所以炒飯都算似模似樣。至於Simon試用拋鑊機之後都話效果唔錯，仲話要將今次嘅炒飯作品帶番屋企同老婆品嘗。黃浩鈞就話，自己暫未有添置自動化爐具嘅需要，但餐飲業需借助科技來營運，肯定係大勢所趨。
