政壇：搞搞政：建制派襲區會議席 胡志偉范國威恐雙失
今屆立法會引入「超級區議員」後，令區議員一席變得奇貨可居。今年十一月，又到新一屆區議會選舉，據聞唔少現時任職區議會同立法會嘅泛民主派雙料議員，都會成為建制派狙擊對象，當中又以民主黨（白鴿黨）胡志偉、新民主同盟范國威有得驚，對手強且資源勁，佢哋真係一個失手，雙料隨即變雙失。
（設計圖片及對白）
民協前成員叫陣圍攻
據知，工聯會（工記）就會派人狙擊胡志偉同范國威，胡志偉係黃大仙瓊富區議員，多年來都係區議會票王，工記有意搵當區居屋居民、社區幹事黃鎮健出選。另一工記社區幹事高永聯就挑戰范國威嘅西貢運亨選區議席，睇番原來高永聯○三年仲係民協成員，三次挑戰區選落敗，佢當時話民協係「民主派嘅二奶」，唔知係咪咁樣，所以決定轉投工記呢？
其實立法會仲有一個雙料議員街工梁耀忠都有危機，不過，街工喺地區嘅實力相對雄厚，驚青程度可能唔及前兩人。
至於現有嘅泛民三席「超級區議員」，白鴿黨何俊仁已表明心迹唔選立法會，民協馮檢基就會遇到工記小花陳穎欣挑戰；涂謹申亦一定有人狙擊，所以，年底真係大把人要攬實個票箱呀。
