政壇：陳家珮出嫁唔離棄海怡
新民黨陳家珮（Judy）去年喺南區區議會海怡西選區補選高票勝出，「升呢」成為區議員，今年五月佢仲會榮升為人妻添！尋日我哋見到Judy無名指戴住一隻好閃嘅鑽戒，於是問佢係咪喜事近，佢甜絲絲咁話就嚟出嫁嘞，未婚夫係銀行界人士。雖然Judy係番書妹，但佢話會依足中國傳統習俗辦喜事，因為始終係屋企第一次辦喜事，父母都好重視喎。
陳家珮五月便做新娘，計劃邀請黨友做證婚人。
Judy透露，佢哋唔會去外地取景影婚紗相，而選擇留喺南區取景，景點包括其選區海怡、淺水灣等；婚後亦會繼續住喺海怡，佢仲話海怡幾好住添。Judy同家人每年都最少去一個地方跑馬拉松，本來今年計劃去撒哈拉，但因為忙於籌備婚事，所以佢要留喺香港，屋企人跑完馬拉松就會返港參加婚禮。除咗屋企人，新民黨都好重視Judy嘅婚事，主席葉劉淑儀話想擔任證婚人，可惜葉太唔係律師，惟有由其他律師黨友代勞喇。
另外，區議會選舉將至，問到Judy有冇信心連任，佢話會努力工作，爭取居民支持。佢仲講笑話，如果落選就會生仔做媽媽，專心湊仔，等老公享受吓男士侍產假喎。
