政壇：港樓價貴震撼克魯格曼
諾貝爾經濟學獎得主克魯格曼（Paul Krugman）一向詞鋒銳利，尋日，佢喺亞洲金融論壇上，就被問及有報告指香港樓價貴絕全球，佢話，自己都有同朋友討論過呢個問題，而佢嘅結論係，「香港樓價好瘋狂！」作為一個國際金融中心，可能地方面積小，令到香港樓價上升吧！昨日克魯格曼仲同特首見咗面。
克魯格曼指中國經濟面臨嘅挑戰令佢成晚都瞓唔着，似乎對中國經濟真係好上心。
克魯格曼曾經講過所有經濟數據最好當做「無聊流派」嘅科幻小說嚟睇，而中國嘅數據就係當中嘅表表者，比科幻更科幻。尋日，佢又話，中國經濟狀況嚇親佢，唔係因為錯誤政策，而係由於調整嘅幅度。佢感言，諗起中國經濟面臨嘅挑戰，就足以令佢成晚都瞓唔着。克魯格曼擔心，中國勞動力萎縮，同一孩政策嘅後遺症有關係，另外，中國都要諗計拆掂經濟增長需求問題。
被問到中國面對嘅潛在危機，佢即答係「環境」。雖然克魯格曼話中國嘅經濟又科幻，又得人驚，但佢對中國長遠前景嚟講，都覺得樂觀嘅，認為「未來仍屬於中國」。
