政壇：嫌外訪津貼奀 乳鴿大貪
剛公布的《施政報告》宣布連串增加區議會資源的措施，明年一月起，新一屆區議會任期內，每名區議員獲加薪一成半，更增設每屆任期一萬元嘅外訪開支撥款，屆時，全港五百多名區議員都可以受惠，不過，加薪、加津貼都有人嗌唔滿意，中西區區議員許智峯就坦言，一萬元津貼肯定唔夠，仲認為呢一萬元應該改為議員辦事處津貼喎，咁係咪要直接落袋嘅意思呢？難怪有人質疑啲區議員得一想二，不如去搶！
（設計圖片及對白）
盼改為議辦津貼
按照施政報告，啲區議員每月近三萬元人工袋袋平安，又可以享有一萬元嘅外訪津貼，起碼外出交流唔使自己掏晒荷包，弊在泛民議員仍然挑剔，譬如呢筆錢最多夠佢哋北上考察，但唔少泛民成員冇回鄉證或唔敢返內地，得「錢」都未必有用。
當中白鴿黨嘅區議員最多疑慮，事關該黨主席劉慧卿早前赴澳門旅遊被拒入境，唔少白鴿友都擔心自己被列入被拒入境的名單之內，索性避開內地、澳門等地，更怕北上時連回鄉證都被內地沒收埋。許智峯就話，筆錢唔夠去遠啲嘅地方，如去內地，佢哋能夠成功闖關機會又微，不如政府將外訪津貼改為議員辦事處津貼，唔北上都可以留港慢慢使。
有建制派議員就承認，其實區議會過去外訪機會唔多，一萬元話多唔多、話少唔少，去幾轉內地都仲夠嘅，但最實際都係加人工。事實上，好多區議員都係全職，因此要靠份糧養起頭家，唔怪得一萬元津貼點用，人人都據理力爭。不過，今次新增嘅話明係外訪津貼，只係幫補吓，就算北上考察都可能會使凸，所以好難話係咪足夠；加上加薪津明年起先實施，班議員都係今年底選舉，成功連任先講啦！
