倡訂標準認證以便選購
隨着食物安全、環境保護、健康水平等議題日受關注，有機產品日益風行。市面上聲稱為有機產品的貨物種類繁多，卻缺乏法律規管及統一標準，市民即使支付更高價格，亦難以確定所購貨品屬有機生產，因而蒙受損失。香港有機資源中心於○五年開始提供認證服務，以便市民選購有機產品。
「我哋會調查本地農戶嘅生產過程，運輸同銷售嗰時有冇受到污染或者撈埋一般貨物賣，證實晒先會畀個認證佢哋，依家已經有一百三十間有機認證農場。」香港有機資源中心總監黃煥忠指出，中心一直致力推廣有機產品認證，除認證本地有機農產品外，現時亦尋求與國際標準互相認證，以便市民選購真正有機產品，「一般市民冇辦法認得到幾十種唔同標籤，我哋會睇番外國個標準係點，合格就同我哋個標籤互認，到時市民認得一種就得。」
