城中鏡：智能雪櫃派街坊 劉強東：有錢賺
京東CEO劉強東近日話雪櫃（內地稱冰箱）行業嘅毛利率曾經一度高達六成，但喺京東等電商出現後，雪櫃毛利率已被壓至百分之十唔到，但佢語不驚人勢不休，直指具備京東智能接入功能嘅雪櫃可以免費派畀街坊。
劉強東話電商同廠家可以通過網上方式賺錢，雪櫃自然可以免費派街坊。（資料圖片）
何解雪櫃可以唔使錢？原來呢個就係大數據衍生嘅無限商機作怪，佢話京東智能雪櫃有好多傳感器，能夠感應到用戶放咗幾多飲料、蔬菜、水果同肉類，而且仲可以提醒你要refill，譬如你雪櫃無晒飲料，屏幕上便會推送京東嘅購買資訊，只要用家click幾個掣，就可以安坐家中等收貨。劉強東好大口氣咁話，電商同廠家可以通過網上方式賺錢，雪櫃自然可以免費派街坊。
劉強東就係靠呢種後續收費，加埋向商家售賣反映用戶需求嘅大數據，睇嚟可以大賺一筆，京東為此已經成立一家針對智能硬件嘅公司NSNG，意思係「no smart no goods」。至於用家方面，想有個想像力豐富嘅雪櫃就要犧牲少少私隱喇！
