城中鏡：港大老鬼歡聚莎厘娜
有「港大飯堂」之稱嘅俄式西餐廳「莎厘娜」，早前因不敵租金而宣布結業，好彩好快就搵到新地方重新開張，尋晚一班「港大老鬼」就返去莎厘娜細說當年，原來七十年代莎厘娜一個學生餐只係賣一元八角，之不過有學生去親都寧願畀貴啲食正常餐，都唔食學生餐。
眾港大校友雲集莎厘娜，一邊摸住酒杯底一邊話當年。右二為馬時亨。
餐廳創辦人王叔（左）同細仔王宗俠重開莎厘娜，最開心就係見到班熟客。
港大一批舊生到有「港大飯堂」之稱嘅莎厘娜敍舊。
徐立之話近年愛上飲威士忌。
肥亨自爆當年常走堂
四十名港大校友尋晚雲集莎厘娜，場面好似去番幾十年前咁熱鬧，出席者包括前經濟發展及勞工局局長葉澍堃、港大前校長徐立之、上訴庭副庭長楊振權，前特首高級特別助理路祥安等人，據知本來另一著名港大校友、前財政司司長梁錦松都話出席，但突然因有要事未能赴會。
講番當年曾經唔食學生餐嘅學生，據講該人就係商務及經濟發展局前局長「肥亨」馬時亨，佢作為莎厘娜常客，尋晚仲帶埋太太捧場。肥亨回想當年讀書時成日走堂，正當佢諗住被其他人鬧時，點知佢太太竟然幫佢護航，仲話依家唔少商界成功人士，以前讀港大時都有走堂，大讚肥亨當年已經有走堂膽識。
葉澍堃無明言當年有冇走堂，但佢尋晚現身時竟然帶住個大煲走入去餐廳，原來佢同兒子都好鍾意飲莎厘娜嘅羅宋湯，次次唔止堂食都飲一大碗，仲要拎走一大煲至滿意。
徐立之則自爆讀書時唔愛飲酒，但近年愛上威士忌，仲話飲酒係必須嘅社交技巧，至於點解獨愛威士忌，佢就話一支公好難飲晒一支紅酒，但開咗唔飲晒好易變，寧願轉飲威士忌，放工後返屋企飲一杯就啱啱好。
