政壇：青年借錢易施榮恆憂心
東華三院委託理大應用社會科學系，喺舊年五至十二月訪問轄下「善膳軒」社區飯堂嘅受惠人士，最後收集到三百多份問卷，來自二百多個基層家庭同百多名青少年，並邀請咗十一名基層婦女同青少年進行面談。結果顯示八成半受訪者無儲蓄習慣，八成九無足夠嘅儲蓄處理緊急財政危機。另有四成受訪青年認為家庭經濟緊絀會影響現時嘅學習機會，五成一擔心會影響未來升學選擇。
施榮恆（中）指新一代消費模式受信用卡廣告影響，以為借錢好容易而忽略咗積蓄。
東華三院主席施榮恆話新一代年輕人嘅消費模式受信用卡廣告影響，令佢哋以為借錢好容易，而忽略咗積蓄嘅重要，建議當局成立家庭及青年儲蓄基金、灌輸整全嘅理財概念、強化基層家庭同青年對社區資源嘅認識，協助佢哋建立脫貧嘅社會資本。
施榮恆又話東華旗下嘅社區飯堂，除咗為基層家庭會員提供十元健康熱食套餐，亦為佢哋提供就業機會，建議當局鼓勵更多以社企模式營運嘅社區飯堂，作為扶貧工作嘅切入點。
