百物騰貴爭拗多 升斗小民好坎坷
小朋友讀書唔好，最怕派成績表，其實香港都一樣，近年無論係社會競爭力、廉潔度以至大學排名，通通好似食咗瀉藥咁，跌跌不休，認真得人驚。不過凡事都有例外，尋日又派「成績表」，香港今次終於威番次，排名連升幾位，飲得杯落喇啩。
可惜吖，排名提升嘅唔係生活質素，而係生活成本。嗱，有調查報告比較全球一百一十九個國家同地區嘅生活指數，香港排名第二十六，唔單止喺兩岸三地中一枝獨秀，更加比舊年攀升五位。你話嘞，調查反映百物騰貴，市民生活愈來愈慘，壓力愈來愈大，有咩值得高興吖？
講真，香港排名之所以未至於名列前茅，係因為調查計晒一個地方衣食住行所有開支，如果單計住屋，香港好可能「獨佔鰲頭」o架。即係咁，一個人可以食平啲，着樸素啲，去少啲街，唯獨住屋冇得慳，對無殼蝸牛嚟講，淨係應付個竇口，收入已唔見咗一大橛。有人形容窮人有生存而無生活，真係一啲都冇講錯。
諗落都幾悲哀，港府開口埋口房屋問題係施政重中之重，但除咗嗌口號之外，到底做過咩實事？睇吓最近港府推出二千幾個新居屋，結果超額申請數十倍，上樓仲難過中六合彩；再睇吓劏房遍地開花，就知房屋問題多年嚟唔單止冇改善，反而不斷惡化添。再咁落去，香港遲早淪為全球最不宜居城市。有高官實牙實齒房屋供應短缺期已經步入尾聲喎，大家即管放長雙眼，睇吓係咪又得個講字。
唉，住屋難泰山壓頂，市民已經夠慘o架喇，偏偏社會愈來愈政治化，紛紛擾擾，簡直令人透唔過氣。有研究發現，好多「港漂」內地專才唔想留低，除咗因為生活同工作環境惡劣，仲因為中港矛盾尖銳，法治倒退，擔心文革重演，於是咪走夾唔抖囉。
最諷刺嘅係，外地專才唔肯留低，本地人只要稍有經濟條件，都諗盡辦法走人，實行用腳投票。大家有眼見，經過佔領之亂，愈來愈多家長送仔女出國留學，有啲甚至索性舉家移民添。難為港府仲旨意港人移民第二代回流，可以紓緩人口老化問題，家陣連本地薑都留唔住，講咩都嘥氣啦！
有人話婚姻好似圍城咁，入面嘅人想出去，出面嘅人想入嚟，點都好過香港吖，入面嘅人想走，出面嘅人都視如畏途，你話係咪悲哀吖，叮！
