成日喺立會會議廳內高叫口號同掟嘢嘅社民連立法會議員「長毛」梁國雄，相信大家都見怪不怪，之前喺特首到立法會出席答問大會都唔例外，長毛一早準備放氣球示威。不過，喺開會前，長毛諗住打開個袋畀人民力量陳偉業睇吓個氣球時不慎甩手，搞到個氣球飛咗上天花板，做騷不成，又要勞煩秘書處派人執番個氣球。

梁國雄喺答問大會上又放氣球示威，秘書處話會向佢收番行政費用。（資料圖片）

由於今次個氣球只係卡喺天窗附近，普通職員都可以爬上去執，唔使好似上次咁要喺會議廳內搭棚咁大陣仗，事後要向長毛收番一萬元行政費。雖然係咁，秘書處表明遲啲會向長毛追收今次清理氣球嘅行政費，費事佢放氣球放得咁過癮，以為隨便放完就算數。唔知今次要收幾多錢呢？

第一手消息請下載on.cc東網iPhone/iPad/Android/Windows Phone Apps